Auður Eir Vilhjálmsdóttir er heiðursfélagi

Auður Eir Vilhjálmsdóttir var gerð að heiðursfélaga Félags háskólakvenna á 90 ára afmælishátíð félagsins í Hátíðarsal Háskóla Íslands14. nóvember síðastliðinn. Auður Eir er fædd 1937 og eftir stúdentspróf frá Verzlunarskóla Íslands árið 1956, hóf hún nám í guðfræði við Háskóla Íslands. Hún var önnur konan til að ljúka guðfræðiprófi hér á landi og fyrst íslenskra kvenna til að taka prestvígslu árið 1974. Þar ruddi hún brautina fyrir konur í þessari rótgrónu karlastétt. Rétt innan við 20 árum eftir að séra Auður Eir tók vígslu, voru konur komnar í meirihluta í guðfræðideild Háskóla Íslands. Kvenprestum hefur einnig fjölgað mjög á liðnum áratugum og því spáð að konur verði jafnmargar körlum í stéttinni innan 10 ára.

Samhliða námi, barnauppeldi og heimilisrekstri, starfaði séra Auður Eir einnig sem lögreglukona um nokkurra ára skeið. Hún var sóknarprestur á landsbyggðinni fyrstu árin eftir prestvígslu en frá árinu 1999 gegndi hún embætti sérþjónustuprests í Reykjavík. Hún lagði snemma áherslu á kvennaguðfræði og stóð fyrir sérstökum kvennamessum í mörg ár. Árið 1993 fór hún fremst í flokki við stofnun séstakrar deildar innan Þjóðkirkjunnar, Kvennakirkjunnar, sem nú hefur starfað í aldarfjórðung.

Við afhendingu var henni þakkað fyrir vel unnin störf í þágu félagsins í gegnum árin en ekki síður fyrir frumkvæði hennar og þrautseigju og fyrir að ryðja brautina fyrir konur í prestastétt – og vera öllum konum fyrirmynd.

Á myndinni eru Hanna Lára Helgadóttir, gjaldkeri FHK, Auður Eir Vilhjálmsdóttir, og Margrét Kristín Sigurðardóttir, formaður FHK.

Heiðursviðurkenningar og rannsóknarstyrkur

Félag háskólakvenna, FHK, var stofnað árið 1928 og fagnaði tímamótunum með 90 ára afmælishátíð í Hátíðarsal Háskóla Íslands 14. nóvember síðastliðinn. Á afmælishátíðinni voru þrjár konur heiðraðar fyrir störf sín, ýmist í þágu félagsins eða fyrir að vera brautryðjendur á sínu sviði og vera öðrum konum fyrirmyndir. Konurnar þrjár sem hlutu heiðursviðurkenningu Félags háskólakvenna eru Guðrún Erlendsdóttir, sem var fyrst íslenskra kvenna til að gegna embætti hæstaréttardómara, séra Auður Eir Vilhjálmsdóttir, sem fyrst íslenskra kvenna tók prestvígslu, og Margrét Kristín Sigurðardóttir, viðskiptafræðingur og fyrrum stjórnarkona í Félagi háskólakvenna, sem árum saman vann ötult og óeigingjarnt starf í þágu Mæðrastyrksnefndar.

Í tilefni afmælisins veitti Félag háskólakvenna 500 þúsund króna rannsóknarstyrk sem fór til Ingunnar Gunnarsdóttur, 28 ára doktorsnema í umhverfis- og auðlindafræði við Háskóla Íslands með sérhæfingu í sjálfbærri orkuþróun og sjálfbærnivísum. Meginmarkmiðið rannsóknar Ingunnar er að þróa sjálfbærnivísa fyrir orkukerfi sem felur m.a. í sér þróun aðferðafræði við val á sjálfbærnivísum ásamt greiningu á ákvarðanatöku og stefnumótun tengd orkumálum á Íslandi.

Á myndinni eru, talið frá vinstri, Halldóra Traustadóttir, Elísabet Sveinsdóttir, Auður Eir Vilhjálmsdóttir, Ingunn Gunnarsdóttir, Guðrún Erlendsdóttir, Margrét Kristín Sigurðardóttir, Margrét Kristín Sigurðardóttir og Hanna Lára Helgadóttir.

Háskólakona ársins er Anna Þorvaldsdóttir tónskáld

Félag háskólakvenna hefur valið Önnu Þorvaldsdóttur, tónskáld, sem Háskólakonu ársins 2018. Anna lauk BA gráðu í tónsmíðum frá Listaháskóla Íslands og meistara- og doktorsgráðu í tónsmíðum frá University of California í San Diego. Hún gegnir um þessar mundir stöðu staðartónskálds við Sinfóníuhljómsveit Íslands. Anna er eitt virtasta tónskáld samtímans á Norðurlöndunum og þó víðar væri leitað. Verk hennar hafa hlotið ýmsar viðurkenningar og verðlaun, þau eru flutt reglulega víðsvegar um heiminn og hafa hljómað á tónleikastöðum og hátíðum í Bandaríkjunum, í Evrópu og Asíu. Eftir Önnu liggja þrjár hljómplötur og er sú fjórða væntanleg í nóvember næstkomandi. Hljómplöturnar hafa hlotið góðar viðtökur og dóma.

Við valið er horft til þess til viðbótar við að viðurkenningarhafi hafi háskólagráðu að framlag Háskólakonu ársins til samfélagsins þyki skara fram úr, að hún sé brautryðjandi á sínu fagsviði og að hún sé góð fyrirmynd fyrir aðrar háskólakonur. Það voru fjölmargar háskólakonur á forvalslista og var það samdóma álit stjórnar Félags háskólakvenna að Anna uppfylli vel öll þau skilyrði sem sett eru fyrir valinu og þykir hafa sýnt í verki hverju það getur skilað að hafa góða menntun í farteskinu samhliða því að leggja rækt við hæfileika sína. Tilgangur þess að velja Háskólakonu ársins er að vekja athygli á fjölbreyttum starfsvettvangi háskólakvenna, beina kastljósinu að störfum þeirra og rannsóknum og undirstrika framlag þeirra til samfélagsins. Auk þess sem félagið vill hampa framgangi þeirra, áræðni og sérstökum árangri.

Félag háskólakvenna var stofnað 1928 og fagnar því 90 ára afmæli á þessu ári. Í fyrra var í fyrsta skipti í sögu félagsins efnt  til vals á Háskólakonu ársins þegar dr. Unnur Anna Valdimarsdóttir, prófessor við læknadeild Háskóla Íslands, varð fyrir valinu en Unnur lauk BA gráðu í sálfræði við Háskóla Íslands og doktorsgráðu í klínískri faraldsfræði við Karolinska Institutet í Svíþjóð. Unnur Anna er meðal annars að vinna að einni stærstu rannsókn sem gerð hefur verið á samspili erfða og heilsufarslegra afleiðinga alvarlegra sálrænna áfalla.

Mynd: Anna Þorvaldsdóttir, tónskáld, tók við viðurkenningu Félags háskólakvenna á Hótel Holti. Á myndinni er Anna ásamt stjórn Félags háskólakvenna, talið frá vinstri: Halldóra Traustadóttir, Helga Guðrún Johnson, Anna Þorvaldsdóttir, Elísabet Sveinsdóttir og Margrét Kristín Sigurðardóttir, sem er formaður félagsins. Auk þess er Hanna Lára Helgadóttir í stjórn félagsins.

Margrét Kristín Sigurðardóttir kjörin nýr formaður

Margrét Kristín Sigurðardóttir er nýr formaður Félags háskólakvenna, FHK. Frá þessu er greint í fréttatilkynningu FHK. 

Félagið er hluti af alþjóðasamtökum háskólakvenna, GWI og fagnar það 90 ára afmæli sínu á þessu ári. Meðal heiðursfélaga FHK eru Vigdís Finnbogadóttir og Geirlaug Þorvaldsdóttir. 

Með Margréti í stjórn FHK eru Elísabet Sveinsdóttir, Hanna Lára Helgadóttir, Helga Guðrún Johnson og Halldóra Traustadóttir.